პარიზის დისნეი ლენდი

დისნეი-ლენდი. ისეირნეთ ზღაპრული კოშკების, თავგადასავლების, მხიარული მთების სამყაროში. 12 მილიონი დიდი და პატარა მნახველი მოწმობენ, რომ პარიზის დისნეი-ლენდი არის ევროპის ყველაზე უხვსტუმრიანი და საყვარელი ადგილი.  ატრაქციონებით, შოუებით და სანახაობებით სიამოვნებისთვის 2-3 დღე უნდა გამოყოთ და დაუვიწყარი შთაბეჭდილებები მიიღოთ. 

დისნეი-ლენდის მთავარი სანახაობა არის პარკი. აშშ-ს ”მაგიური სამეფოს” მსგავსად პარიზის პარკიც ხუთ ნაწილად არის დაყოფილი თემების მიხედვით, რომლებიც უმშვენიერეს მძინარე მზეთუნახავის სასახლეს გარს ერტყმიან. აქ შეგიძლიათ ესტუმროთ ველურ დასავლეთს, სადაც მოჩვენებების სახლი და იდუმალი მთაა. 

 Adventureland, როგორც სახელწოდებაც მიგვანიშნებს, თავგადასავლების სამყაროში მივყავართ, სადაც პირატებს და ავაზაკებს გადავეყრებით. Discoveryland პოპულარული სანახაობაა პარკში, რადგან აქაურობას ფიქტიურ მომავალში გადავყავართ. ფანტაზიების  ქვეყანაში განსაკუთრებით პატარა სტუმრებს უყვართ გასეირნება, რადგან აქ უოლტ დისნეის სამყარო ელოდებათ. დისნეის სტუდია-პარკში შესაძლებელია მისი ფილმების კულისებში შეხედვაც, ასევე სატელევიზიო სტუდიის დათვალიერება. 

  

 

 

 

 

 

პოტსდამი – გერმანიის მშვენება

     პოტსდამი მიმზიდველი და სასიამოვნო ადგილია მოგზაურობისა და დასვენებისთვის. ბრანდერბურგის დედაქალაქი ბევრ საინტერესო სანახაობას გვთავაზობს და სილამაზით ხიბლავს მნახველებს.

ქალაქი მდიდარია სასახლეებით, ბაღებით, ისტორიული ადგილებით. ძველ არქიტექტურულ შედევრებს ახლებიც ემატება. გერმანიის ეს ერთ-ერთი უმშვენიერესი ქალაქი ერთნაირად საინტერესოა სრულიად განსხვავებული ინტერესების და დასვენების მოყვარულებისთვის. 

    გასულ წლებში ქალაქში შეიქმნა თანამედროვე ტურისტული ინფრასტრუქტურა, რომელიც ყველა სურვილებს და მოთხოვნებს აკმაყოფილებს. თანამედროვე სასტუმროები, პანსიონატები, კერძო სასტუმროები სტუმრებს ყველანაირ კომფორტს სთავაზობენ. 

    სანსუსის პარკი (Sanssouci Park)

    პოტსდამის მთავარი და მიმზიდველი სანახაობა აერთიანებს ბუნებას, სასახლეებს, პატარა მშვენიერ ნაგებობებს. 2,9 კმ² სიდიდის პარკში არის 2,5 კმ. მთავარი გზა, რომელიც მიუყვება ულამაზეს პატარა მოედნებს ფანტანებით, სკულპტურებით და ყველა ღირშესანიშნაობას თავს უყრის. თუ პარკს მთავარი გზის აღმოსავლეთიდან გაუყვებით, მიადგებით დიდ ფანტანს, საიდანაც სანსოუცის მსოფლიოში ცნობილ სასახლეს იხილავთ. 

    330 მეტრი სიგრძის ორანჟერიის სასახლე იტალიური რენესანსის ტიპის ნაგებობების მიხედვით აშენდა. ორანჟერიის წინ აღმართულია მეფის ქანდაკება, რომელსაც ეს მშვენიერი ნაგებობა მიეწერება: ფრიდრიხ II-ს მარმარილოს ცხენიანი ქანდაკება კრისტიან დანიელ რაუხის ბერლინში აღმართული ბრინჯაოს ქანდაკების მცირე ასლია.

პარკი უხვადაა მორთული ქანდაკებებით. თუ მათ დაითვლით, შესაძლოა 400-ს გადასცდეთ.

    ახალი სასახლე სანსუსის პარკში

    სანსოუცის პარკში მდებარეობს  XVIII საუკუნის უდიდესი ნაგებობა – ახალი სასახლე (1763-69) ორასი დარბაზით, სხვადასხვა ღვთაების 428 ქანდაკებით, რომლებზეც თორმეტი მოქანდაკე და რამდენიმე ათეული ქვის ოსტატი ექვსი წლის მანძილზე მუშაობდა და რთავდა სასახლის ფასადს. სასახლის თეატრს სამხრეთ ფრთაზე ორი ზედა სართული უკავია. 

    აკლდამის ფორმით მოწყობილ სასახლის ერთ-ერთ დარბაზს ამშვენებს უამრავი ლოკოკინას და მოლუსკის ფორმები. ეს დარბაზი ერთ-ერთია 60 დარბაზიდან, რომელთა დათვალიერებაც ნებადართულია. დარბაზები ავეჯით, ფაიფურით, ლამაზი ნივთებით არის მორთული. ახალი სასახლე ფლობს 300 ნახატს. აქ უმთავრესად წარმოდგენილია იტალიელი, ჰოლანდიელი, ფრანგი მხატვრები. სასახლის მთავარი დარბაზი არის მარმარილოს დარბაზი ზედა სართულზე. ფრანგულ სარკეებიან დარბაზს მიმსგავსებული მარმარილოს გალერეა პირველ სართულზე ადრე სასადილო ოთახის როლს ასრულებდა. სამხრეთის ფრთაზე არის ფრიდრიხ II-ს საცხოვრებელი. 

    ახალი სასახლის ჩრდილოეთით მდებარე ანტიკური ტაძარი არის რომის პანთეონის მცირე ასლი. 1830 წლამდე მეფეები ანტიკურ საგანძურს ინახავდნენ, სანამ ამ საგანძურს ბერლინის მუზეუმში გადაიტანდნენ.

    სანსუსის სასახლე

    1747 წლის 1 მაისს ფრიდრის II-მ საზეიმო ბანკეტით გახსნა სანსოუცის სასახლე. ის ჩაფიქრებული იყო, როგორც ზაფხულის რეზიდენცია, მაგრამ მოგვიანებით მეფე მთელ დროს ამ სასახლეში ატარებდა.

    სასახლე ცნობილია მსოფლიოში და მდიდარია ავეჯით, სურათებით, ფაიფურის ნაწარმით, უმეტესად XVIII საუკუნიდან. გერმანული როკოკოს ულამაზეს დარბაზდ ითვლება სარკეებით ოპტიკურად გავრცობილი საკონცერტო დარბაზი, სადაც მხატვრობა, სკულპტურა, ხელოვნება ერთიან სურათს ქმნიან. საკონცერტო დარბაზს უერთდება მისაღები, სადაც სტუმრები მეფის აუდიენციას ელოდებოდნენ. 

    სასახლის ბიბლიოთეკაში 2200 წიგნია დაცული, რომლებიც პოტსდამის ქალაქის სასახლიდან გადმოიტანეს. ფრიდრიხის სამუშაო და საძინებელი ოთახებმა ცვლილება განიცადეს მისი გარდაცვალების შემდეგ. მისმა მემკვიდრემ ვილჰელმ II-მ დარბაზები კლასიკურ სტილში მოაწყო.

    ბორნშტედის მამული (Krongut Bornstedt)

    თავადების მამული წლების მანძილზე რემონტდებოდა და 2002 წლის ზაფხულში გაიხსნა. აქ თქვენ გაეცნობით ბრანდერბურგის და პრუსიის ისტორიას. აქ არის ლუდის სახარში და საცხობი, კაფე და საკონდიტრო, ასევე მანუფაქტურა. თითქოს ცოცხლდება ძველებური საქმიანობა მნახველის წინაშე, კალათების დაწვნა თუ მინის ოსტატობა. ბატოის სახლში კვლავ აღადგინეს კაიზერის სალონები.

    იტალიური სტილის ხორცისფრად და ვარდისფრად შეღებილი შენობების კომპლექსი სანსოუცის სასახლიდან მხოლოდ რამდენიმე ასეული მეტრითაა დაშორებული. კაიზერმა ფრიდრიხ III-მ და მისმა ინგლისელმა მეუღლემ ეს კომპლექსი საჩვენებელ მამულად გადააქციეს. 

   

    მარმარილოს სასახლე ახალ ბაღში

    ფრიდრიხ ვილჰელმ II-მ 1787-91 წლებში ბრძანა ძვირფასი რეზიდენციის აგება. დღეს ამ სასახლეში უძვირფასესი ხელოვნების ნიმუშებით დატკბობა არის შესაძლებელი. უძვირფასესი ლურჯი ფაიფურის ნაკეთობები მნიშვნელობით და ხარისხით უნიკალურია.

    ზედა სართულზე დარბაზები გარს აკრავს მარმარილოს ცენტრალურ საფეხურებს. აქ განსაკუთრებულია აღმოსავლურ სტილში მოწყობილი დარბაზი.

საბჭოთა არმია სასახლეს ოფიცრების კაზინოდ იყენებდა. 1961 წელს გერმანიის დემოკრატიულმა რესპუბლიკამ სასახლეში არმიის მუზეუმი მოაწყო.

    სესილიას სასახლე ახალ ბაღში

    ყველაზე გვიან და თანამედროვე სასახლეში არის 176 დარბაზი, რომლებიც ხუთი შიდა ეზოთია გამოყოფილი ერთმანეთისგან. დღეს სასახლის ერთი ნაწილი სასტუმროს როლს ასრულებს. სასახლის სხვა ნაწილებში კი მუზეუმია. 

    სესილიას სასახლე 1913-17 წლებში აიგო და აქ ჩატარებული პოტსდამის კონფერენციის შემდეგ მსოფლიო ისტორიაში შევიდა. 1945 წლის 2 აგვისტოს შუაღამეს მრგვალ მაგიდასთან სამი სახელმწიფოს მეთაურის მიერ ხელი მოეწერა პოტსდამის შეთანხმებას. დიდ ეზოში ყვავილებისგან შექმნილი საბჭოთა ხუთქიმიანი წითელი ვარსკვლავი არის გერმანიის დემოკრატიული რესპუბლიკის დანატოვარი. რადგან საბჭოთა კავშირი ომის მთავარ ტვირთს ატარებდა და წამყვან როლს თამაშობდა, ამ ვარსკვლავის გარშემო შეთანხმდა სამი ძლევამოსილი სახელმწიფოს მეთაური   ომში ერთობლივი მოქმედების შესახებ.  

საკონფერენციო დარბაზი და დელეგაციების სამუშაო ოთახები თავდაპირველ ფორმას ინარჩუნებს. როდესაც სასახლე კონფერენციისთვის შეარჩიეს, ორიგინალური ავეჯის ნაწილი გაქრა. ამიტომ სასახლის 36 დარბაზი აღიჭურვა ავეჯით პოტსდამის სხვა სასახლეებიდან და ვილებიდან.

პრინცის ყოფილი სამუშაო და მოსაწევი ოთახები პრეზიდენტმა ტრუმანმა გამოიყენა სამუშაო და თათბირის დარბაზებად. უინსტონ ჩერჩილი პრინცის ყოფილ ბიბლიოთეკაში მოთავსდა, თუმცა მხოლოდ რამდენიმე კვირა დატკბა ბაბელსბერგის სასახლიდან გადმოტანილი უძვირფასესი ავეჯით. არჩევნებში დამარცხების შემდეგ მან გზა ატლეეს დაუთმო. სტალინმა წითელი სალონი აირჩია, პრინცესას სამუშაო ოთახი. მისი სამუშაო ადგილი იყო ბუხარსა და ფანჯარას შორის საწერ მაგიდასთან. 

    ზედა სართულებზე ტახტის მემკვიდრეების პირადი დარბაზებია, სადაც მათი მუდმივი საცხოვრებელი უნდა ყოფილიყო, მაგრამ საბჭოთა არმიის შემოსვლის შემდეგ 1945 წელს მათ სასახლე მიატოვეს და დასავლეთს შეაფარეს თავი.

    ბაბელსბერგის პარკი და სასახლე

    ბაბელსბერგის პარკის ხედი ტბის სიღრმეში, მდინარე ელბის შენაკადი ჰაფელი და განთქმული გლინიკის ხიდი განუმეორებელია თავისი მშვენებით. პეტერ იოზეფ ლენემ პარკს რომანტიული ელფერი აჩუქა. 

    პარკში მთავარი ღირშესანიშნაობაა ბაბელსბერგის სასახლე. 50 წელზე მეტხანს ის იყო პრინც ვილჰელმის, შემდგომში კაიზერ ვილჰელმ I-ის და მისი მეუღლის აუგუსტას საზაფხულო რეზიდენცია. სასახლესა და მის პარკში 1862 წლის 22 სექტემბერს შედგა უმნიშვნელოვანესი მოლაპარაკება მეფე ვილჰელმ I-სა და ბისმარკს შორის, რაც დამთავრდა ბისმარკის პრემიერ-მინისტრად და საგარეო მინისტრად აღიარებით.

ინგლისური გოთიკის სტილში გადაწყვეტილი ნაგებობა 1835-1849 წლებში აიგო. გეგმის შემუშავება დაევალათ ცნობილ არქიტექტორებს კარლ ფრიდრიხ შინკელს, ლუდვიგ პერსიუსს და იოჰან ჰაინრიხ შტრაკს. მშენებლობა ორ ფაზად წარიმართა. სასახლეში განსაკუთრებით შთამბეჭდავია საცეკვაო დარბაზი მისი ვარსკვლავებიანი ჭერით და შთამბეჭდავი ინტერიერით. 

    ბაბელსბერგის სასახლე არის პრუსიული სასახლეების და ბერლინ-ბრანდერბურგის ბაღების ფონდის და UNESCO-ს მფარველობაში.

ბაბელსბერგის პარკში სეირნობისას ასევე თვალში მოსახვედრია ულამაზესი პატარა სასახლე, მშვენიერი ფანჩატურები, საჯინიბო, მატროსების სახლი. 

    ბაბელსბერგის ფილმების პარკი

    ფილმების სამყარო ისეთი არ არის, როგორიც გარედან ჩანს. ბაბელსბერგის ფილმების პარკში მნახველებს კულისებში შეხედვა შეუძლიათ. აქ ნახავთ, რამხელა შრომით, სიყვარულით და რამდენი წვრილმანის გათვალისწინებით ხდება ფილმებზე მუშაობა.

   დაძაბული სანახაობა ელის ყველას პარკში, სადაც ტრიუკების ოსტატები, ცხოველების მომთვინიერებლები, პიროტექნიკოსები მნახველებს აოცებენ ოსტატობით. სატელევიზიო სტუდიაში მსურველებს შეუძლიათ მოექცნენ ყურადღების ცენტრში როგორც დიქტორები, სინოპტიკოსები, მენეჯერები. 

    მედიის ქალაქში მოგზაურობით ბაბელსბერგი გვახედებს ისტორიაში, აწმყოსა და მომავალში. ასევე მნახველებს შეუძლიათ ახლოდან გაეცნონ პოპულარული მოღვაწეების საქმიანობას.

    პარკი ბევრ სიამოვნებას მოგანიჭებთ, გაგაოცებთ და განგაცდევინებთ. ბავშვებს აქ მრავალი საინტერესო და დაუვიწყარი სანახაობა ელით. 

 

    ჰოლანდიური კვარტალი ისტორიული ცენტრში

    პოტსდამის ცენტრში არის პატრა ჰოლანდიური იდილია ”პატარა ამსტერდამად” წოდებული. 

1734 წელს ჰოლანდიელი კოლონისტებისთვის დაიწყო არქიტექტურული ანსამბლის მშენებლობა. 1742 წელს მშენებლობა დასრულდა. კომპლექსი 100-ზე მეტ ულამაზეს სახლს აერთიანებს მშვენიერი ბაღებით. ჰოლანდიას მოგვაგონებს ასევე წითელი აგურით ნაშენი სახლები, რომლებიც ”პატარა ამსტერდამის” დასრულებიდან 40 წელში აიგო.

    Biosphäre Potsdam

    გერმანიის უდიდესი ბოტანიკური ბაღი წარმოგვიდგენს ჯუნგლებს 20000 მცენარით. 14 მეტრი სიმაღლის ხეები და პალმები მწვანე სახურავს ქმნიან. ბილიკებს ამკობენ ორქიდეები, კაკაოს და ყავის ხეები. ჩანჩქერი, ტროპიკული ტყის შრიალი, წვიმის ხმა ჯუნგლების ატმოსფეროს ქმნიან.

   ტერარიუმი მწერებით, ტროპიკული თევზებით ტროპიკულ ცხოველთა სამყაროს გვაცნობს.

     ჰანს-ოტოს თეატრი

    თეატრის ახალი შენობა ქალაქის ერთ-ერთ ღირსესანიშნაობად იქცა. მისი ხედი ტბის სივრცეში ულამაზესი სანახაობაა. ახალ თეატრში გრძელდება პოტსდამის მდიდარი თეატრალური ტრადიციები. 

    1952 წლიდან თეატრი ჰანს-ოტოს სახელობისაა. ეს იყო უაღრესად ნიჭიერი და პერსპექტიული ახალგაზრდა მსახიობი, რომელიც ნაცისტურმა რეჟიმმა გაასამართლა და შემდგომ სიკვდილით დასაჯა. ჰანს-ოტო პირველი  და ყველაზე ავტორიტეტული მსახიობი იყო, რომელიც ნაცისტურ რეჟიმს ემსხვერპლა. ერთ-ერთ ღია წერილში ბერტოლდ ბრეხტი მას მოიხსენიებს, როგორც იშვიათ და მოუსყიდავ პიროვნებას.

მეტეორა - ღრუბლებში მოლივლივე მონასტრები

მეტეორას სამონასტრო კომპლექსი მდებარეობს საბერძნეთში, პინდოს მთის აღმოსავლეთით, თესალიის ქალაქ კალამბაკასთან. მონასტერი  UNESCO-ს მსოფლიო კულტურულ ძეგლთა სიაშია შეტანილი. სახელი ”მეტეორა” წარმოდგება ბერძნული სიტყვიდან ”მეტეორიზო”, რაც სიმაღლეზე ასვლას ნიშნავს. ეს სახელი მონასტრის მდებარეობაზე მიგვანიშნებს, რომელიც მაღალ კლდეებზეა გაშენებული და ნისლიან ამინდში ჰაერში მოლივლივე გეგონებათ.

საერთო კომპლექსი შედგება 24 მონასტრისა და კელიისგან. ამ მონასტრებიდან დღეს მხოლოდ ხუთია დასახლებული, დანარჩენი თვრამეტი ან ძნელად მისასვლელია ან ჩამონგრევის საფრთხის გამო არის მიტოვებული.

მონასტერს, გადმოცემის თანახმად, პირველი ბინადარნი XI საუკუნიდან ჰყავს. ზოგიერთი გადმოცემის თანახმად, X საუკუნიდან. წლების განმავლობაში მონასტრის ძმობა ორგანიზებული ხდებოდა წმიდა მთის ათონის მონასტრის მაგალითზე. მოგვიანებით აქ მოღვაწე ბერებმა შექმნეს პირველი მონასტერი - დოუპიანი.

ათონის მთიდან წამოსული ბერის, ათანასეს, დასახლების შემდეგ 1334 წელს, რეგიონში სამონასტრო ცხოვრების განვითარებას ჩაეყარა საფუძველი. 1344 წელს წმინდა მამა ათანასემ თავის სულიერ მამასთან გრეგორიუსთან და 14 ბერთან ერთად დაარსა მონასტერი Metamórphosis, ცნობილი ასევე როგორც Megálo Metéoro. მამა ათანასემ დაადგინა მონასტრის წეს-განგებაც. გარდაცვალების შემდეგ ის წმიდანად იქნა აღიარებული.

XIV საუკუნის მანძილზე მეტეორაზე ახალი მონასტრები აშენდა. ამ მონასტრებს  ფინანსურად ეხმარებოდნენ ქვეყნის მორწმუნე ხელისუფალნი. წლების მანძილზე დაარსდა რამდენიმე მონასტერი, რომელთა დამაარსებლების სახელები მხოლოდ ნაწილობრივ შემოინახა.

           მეტეორაზე სამონსასტრო ცხოვრება ყვაოდა XV-XVI საუკუნეებში. შემდეგ პერიოდში კი 24 მონასტრიდან უმეტესობა თანდათან დაინგრა და დღეს მხოლოდ ხუთია მოქმედი: Metamórphosis, Varlaám, Rousánou, Agía Triáda, Agios Stéfanos და Agios Nikólaos Anapavsás. დღეს მათი დათვალიერება შესაძლებელია.   

Doúpiani: ეს მონასტერი არის პირველი, რომელიც მეტეორაზე დაარსდა. თავად მონასტერმა დღემდე ვერ მოაღწია, მაგრამ XIII საუკუნის სამლოცველო დღემდე დაცული და მოქმედია. სარემონტო სამუშაოები ჩატარდა 1867 და 1974 წლებში.
Filakaé Monakón: გადმოცემის თანახმად ამ კლდეზე ბერების საპყრობილე იყო. ბერები, რომლებიც მონასტრის მკაცრ წესებს არ ემორჩილებოდნენ, აქ იგზავნებოდნენ სინანულისთვის.
Agios Nikólaos Anapavsás: მონასტერი დღესაც დასახლებულია. იოანე ნათლისმცემლის ტაძარში მოღვაწეობენ ბერები, რომლებიც ადრე ტაძარში ცხოვრობდნენ. უნიკალურია თეოფანე კრიტელის ფრესკები და მხატვრობა, რომელიც XVI საუკუნით თარიღდება.

 Rousánou (Arsánou): ჯერაც დასახლებული მონასტერი, გადამოცემის თანახმად 1388 წელს დაარსდა. სხვა წყაროები დაარსების თარიღად 1288 წელს ასახელებენ. ისტორიული დადასტურება ჯერ არც ერთ თარიღს არ მოუპოვებია. ბევრი თავდასხმის და აოხრების შემდეგ, Rousánou დაკარგვის საფრთხის წინაშე დადგა. 1950 წელს კომპლექსის შენარჩუნებისთვის ჩატარდა ფართო მაშტაბიანი სარესტავრაციო სამუშაოები და დღეს ის დეადთა მონასტერია. აღსანიშნავია მონასტრის XVI საუკუნის ფრესკები.

Varlaám: XIV საუკუნეში დაარსებული მონასტერი დღესაც დასახლებულია. პირველი ბერის გარდაცვალების შემდეგ, რომელიც აქ დასახლდა, მონასტერი მცირე ხნით გაუკაცრიელდა. 1518 წელს დაიწყო მონასტრის მშენებლობა, რომელიც 1535 წელს დასრულდა. 1779 წელს ერთი მოგზაური წერდა, რომ მონასტრის მშენებლობის დღიდან ამ ტერიტორიაზე ქალს ფეხი არ დაუდგამს. 

Metamórphosis, ასევე ცნობილი როგორც Megálo Metéoro. სამონასტრო კომპლექსი 60000 კვ.მ ფართობით არის ყველაზე დიდი მეტეორას მონასტრებს შორის. ის განლაგებულია ზღვის დონიდან 613 მ. სიმაღლეზე და დღესაც ბერებითაა დასახლებული. სახელი Metéoro - მოლივლივე - მონასტერმა მიიღო მისი დამაარსებლის ბერი ათანასესგან. მანამდე პლატოს ერქვა Platýlithos - ბრტყელი ქვა. 1923 წლამდე მონასტერში ასვლა მხოლოდ თოკის კიბით შეიძლებოდა. დღეს 143 საფეხურიანი ქვის კიბეს და გვირაბს მივყავართ სამონასტრო კომპლექსში. მთავარ ეკლესიაში შემორჩენილია 1552 წლის ფრესკები. აღსანიშნავია ასევე ათანასეს გამოქვაბული მონასტრის შესასვლელში. 

Agía Triáda: (წმიდა სამება) მონასტერი სავარაუდოდ 1458-1476 წლებში აშენდა. ზუსტი თარიღები არ არის ცნობილი. მონასტერი დღესაც მოქმედია. თავიდან მისასვლელი მხოლოდ თოკის კიბით იყო. 1925 წელს მანესტერს გაუკეთეს კლდეში ნაკვეთი საფეხურები. ეკლესია შემკობილია ფრესკებით, რომლებიც 1741 წლით თარიღდება. აღსანიშნავია 1539 წლით დათარიღებული მონასტრის სახარება. დაბეჭდილი სახარება ვერცხლის ყდით ვენეციიდან არის ჩამოტანილი. ეს მონასტერი ცნობილია მთელ მსოფლიოში. ჯეიმს-ბონდის სერიალის ერთ-ერთი ფილმის, ”სასიკვდილო მისია”, ერთი ნაწილი ამ  მონასტრის ტერიტორიაზეა გადაღებული. 

Agios Stéphanos: დაახლოებით 1400 წელს დასრულებული მონასტერი დღესაც მოქმედია. კლდეზე მოსახლეები ბევრად უფრო ადრე გამოჩნდნენ. 1927 წლამდე შემორჩენილი იყო წარწერა, რომელიც 1192 წელს მონასტრის ძმობასთან შეერთების მსურველთათვის იყო განკუთვნილი. მონასტერს ასევე ”სამეფოს” უწოდებენ, რაც 1333 წელს კეისარ ანდრონიკოს III ვიზიტთან არის დაკავშირებული. ხელისუფალი იმდენად მოიხიბლა ბერების სტუმართმოყვარეობით, რომ უხვი წყალობა გაიღო და მიწებიც გადასცა მონასტერს. XIX საუკუნეში 30-ზე მეტი ბერი ცხოვრობდა მონასტერში და მათი რიცხვი მატულობდა. 1960 წელს მონასტერი თითქმის დაცარიელდა და 1961 წელს აქ დედათა მონასტერი დაარსდა. განსაკუთრებული სანახაობაა იშვიათი ოსტატობით შესრულებული ეპისკოპოსის ტახტი და საგალობლების პულტი. 

 მეტეორას კლდეები ასევე არის ალპინისტების საყვარელი ადგილი საბერძნეთში. ამ კუთხით მეტეორათი პირველად დაინტერესდა გერმანელი ალპინისტი დიტრიხ ჰასე, რომელმაც სახელმძღვანელოც შექმნა აქ ექსკურსიების და ალპინიადების მსურველთათვის. 

სანტორინი - თვალისმომჭრელი კუნძულები

ნამგალის ფორმის სანტორინის კუნძული მდებარეობს კრეტას ჩრდილოეთით, 100 კილომეტრის დაშორებით და გეოგრაფიულად ბერძნული კიკლადების არქიპელაგის ჯგუფს მიეკუთვნება, რომელშიც ასევე მიკონოსი შედის. კუნძულებს დახლოებით 90 კვ.კმ. ფართობი უკავია და 14 000 ადამიანითაა დასახლებული.

სანტორინი, თავის მხრივ,  სამი კუნძულისგან შედგება. მთავარი კუნძული თირა ნამგალის ფორმით უფრო პატარა კუნძულების თირასიას და ასპრონისის პირდაპირ მდებარეობს. 

 ძველი წელთაღრიცხვით 1628-1627 წლებში უდიდესი ზღვისქვეშა ვულკანი ამოიფრქვა, რის შედეგადად წყლის უზარმაზარმა ნაკადმა კრეტაზე მინოიური კულტურის ძეგლები გაანადგურა. უძლიერესმა ვულკანმა კუნძული გახლიჩა და დღევანდელი ფორმა მისცა.

ყველაზე მაღალი მთა არის ელიას მთა 565 მ. სანტორინი ტურისტებისთვის გახსნილია, აქვს საკუთარი აეროპორტი, ასევე ულამაზესია მოგზაურობა გემით. კუნძულზე არის საუკეთესო სასტუმროები, ბანაკები, კერძო სასტუმროები. 

 

სანტორინისთვის დამახასიათებელია თეთრი და ყვავილებით შემკული სახლები. ბევრი მათგანი ლურჯი სახურავით არის დახურული - ეს პატარა ზომის მართლმადიდებლური ეკლესიაა. ყოველი ასეთი პატარა ეკლესია, რომელიმე ადგილობრივი ან ჩამოსული ოჯახის მიერ არის აშენებული რაიმე ღირსშესანიშნავი მოვლენის აღსანიშნავად და უფლისადმი მადლიერების გამოხატვის ნიშნად. სანტორინის აქვს რამდენიმე პლიაჟი. ყველაზე ცნობილია კამარი.

ძველი თერა

გერმანელმა ბარონმა ჰილერ ფონ გერტინგენმა 1866-1902 წლებში თავისი ხარჯებით მოაწყო გათხრები და მესავოუნოს მთაზე 6 მ. სისქის მიწის და ფერფლის ქვეშ აღმოაჩინა ანტიკური ქალაქის - თერას ნაშთები. 

თერა ძველი წელთაღრიცხვით 1000 წელს დააარსეს დორიელებმა, რომლებმაც საბერძნეთზე გაიარეს. ძველი წელთაღრიცხვით 630 წელს თერადან გადმოსახლებულებმა დააარსეს ჩრდილოაფრიკული კოლონია კირინიე. თერაში შემორჩენილი შენობების ნაშთები ელინურ ეპოქას მიეკუთვნება (322-169 ძვ.წ.), როდესაც ეგვიპტეში მცხოვრები მმართველები პროლემეირის დინასტიიდან ეგეოსის კუნძულებს აკონტროლებდნენ. სანტორინი მათთვის იყო საზღვაო ფლოტის ბაზა. კამარის სანაპიროს და მესავოუნოს ციცაბო კლდოვან ნაპირს შორის კუთხე მათთვის ხელსაყრელი ნავსადგური იყო, რადგან სამი მხრიდან ციცაბო კლდოვანი ნაპირი აქვს და ამიტომ ქალაქი ძნელად დასაპყრობად ითვლებოდა. რომაელთა ხანაში ქალაქმა დაკარგა თავისი მნიშვნელობა.

ძველი თერა მდებარეობს მთებში, კამარის და პერისას სანაპიროებს შორის. 

 დათვალიერება იწყება პატარა სამლოცველოთი Agios Stefanos, სადაც შეინიშნება ადრექრისტიანული ბაზილიკის ნარჩენები. კლდოვან პლატფორმასთან მივყავართ გზას, სადაც პტოლემეელი ადმირალის ბრძანებით ტაძარი იყო აგებული. კედლის რელიეფურ ნამუშევარზე არწივი ზევსის სიმბოლოა, ლომი – აპოლონის, დელფინი – ზღვის ღმერთის პოსეიდონის. ასევე შესაძლებელია ტაძრის დამაარსებლის სურათის ნახვა. შემდეგ გზა ანტიკურ აგორასთან მიდის, საბაზრო მოედანთან, სვეტებიანი დარბაზების და ნაყოფიერების სიმბოლოს დიონისეს ტაძრის ნაშთებით. მარცხნივ გვხვდება პტოლემეურ-რომაული ტაძარი და რომაული აბანოები. შემდეგ მივდივართ კლოდვან ადგილას, რომელიც აპოლონის კულტის ცენტრი იყო. ამ ტერასაზე ასევე მდებარეობდა ძველი წელთაღრიცხვის VI საუკუნის აპოლონის ტაძარი, რომლისგანაც ბევრი აღარაფერია შემორჩენილი.

 ფირას მართლმადიდებლური საკათედრო ტაძარი 

 

თანამედროვე ბერძნული მართლმადიდებლური ტაძარი კუნძულების დედაქალაქ ფირაზე მაღალი გუმბათით ულამაზესი სასტუმრო ატლანტისის გვერდით მდებარეობს. ეკლესია ღმრთისმშობლის სახელზეა ნაკურთხი. 1956 წლის მიწისძვრის შემდეგ ის თითქმის ახლიდან აშენდა და ულამაზესი კედლის მხატვრობით შეიმკო. 

 კაპ აკროტირი და მისი შუქურას კოშკი

სანტორინის სამხრეთ-დასავლეთით არის განსაკუთრებული ადგილი, სადაც უმშვენიერესი შუქურიანი კოშკია აგებული. 110 მ. სიმაღლიდან ის გზას უჩვენებს კრეტადან და როდოსიდან მომავალ გემებს. 

 შუქურას გარშემო შესაძლებელია კლდოვან ბორცვებზე აცოცება და განმარტოებული და წყნარი ადგილის მონახვა, რათა აქედან კრეტის ზღვის და გარემოს სილამაზით დატკბეთ. მზის ჩასვლის პერიოდი განსაკუთრებით ლამაზია ამ ადგილას.

სანტორინის სანაპიროები

წითელი სანაპირო

ეს სანაპირო 200 მ. სიგრძისაა და გადაჭიმულია წითელლავა ციცაბო სანაპიროზე. აკტორინის სადგურიდან აქ 15 წუთში შეიძლება ფეხით მისვლა, შესაძლებელია ნავის დაქირავებაც. სანაპირო ულამაზესია. აქვე შეიძლება ქოლგის და შეზლონგის დაქირავება და ცივი სასმელების გასინჯვა. 

 თეთრი სანაპირო

თეთრი სანაპირო მხოლოდ 70 მ. სირძისაა. სანაპირომდე მისვლა ნავით არის შესაძლებელი. სანაპიროზე მისასვლელი უხეში ქვიშითაა დაფარული და ამიტომ ფეხით მისვლა არ არის სასურველი. 

 

თეთრი სანაპირო ქვიანია. აქაც შესაძლებელია დასვენება და ცივი სასმელების დაგემოვნება. თეთრი სანაპიროდან ცურვა პატარა თეთრ კლდეებს შორის არის ულამაზესი. ცხელ სეზონზე აქ უამრავი ხალხია. 

 პერივოლის სანაპირო

პერივოლის სანაპირო არის ფაფუკი ქვიშიანი და სანტორინიზე ყველაზე გრძელი. ის 20-30მ. სიგანისაა და ადვილად მისასვლელი ფეხითაც და საზოგადოებრივი ტრანსპორტითაც. 

 

სანაპიროს ვიწრო ქუჩას გარს აკრავს ტავერნები, თვალშისაცემად ლამაზად მოწყობილი ბარები, სადაც მუდამ ხალხმრავლობაა და სასმელების ყველა სახეობას გვთავაზობენ, განსაკუთრებით კოქტეილს და შამპანურს. სანაპიროზე შესაძლებელია წყლის სპორტის სახეობებში თავის გამოჩენაც. 

 

ვლიხადას სანაპირო

ვლიხადას სანაპირო იწყება  ამავე სახელობის იახტების და სამაშველო სამსახურის ახალი ნავსადგურიდან და სამხრეთისკენ არის გადაჭიმული თითქმის 1 კილომეტრზე.

სამხრეთ ნაწილში მდებარეობს ულამაზესი სანაპიროს ბარი "Thros Beach". აქვეა ფრენბურთის მოედანი. 

მონოლითოს სანაპირო

მონოლითოს სანაპირო შორიდან თვალშისაცემია იმ ლამაზი კლდის გამო, საიდანაც მეზობელი კუნძული ანაფი ჩანს და რომლის სახელიც სანაპიროს ეწოდა. ის არის 33 მ. სიმაღლის და 200 მლნ. წელზე მეტი ხნის.სანაპიროზე არის უძველესი ტავერნა სკარამანგასი, სადაც თევზის დაგემოვნებაცაა შესაძლებელი. 

 

კრეტა - მზის და ზღვის სამეფო

კრეტა ცნობილი საკურორტო კუნძულია. ყოველწლიურად მილიონობით ტურისტი სტუმრობს კუნძულს.კრეტა ყველაზე დიდი კუნძულია საბერძნეთში (8000 კვ.კმ.), 600 000 მცხოვრებით. ის არის ევროპის ერთ-ერთი უკიდურესი სამხრეთი კუნძული და ამინდი აქ უნიკალურია - 300 მზიანი დღით. 

 ტურისტების სიმრავლე უფრო მეტად შეინიშნება კრეტის ჩრდილოეთით. ქალაქების და ნავსადგურების ჰერაკლიონის და ხანიას ახლოს მდებარეობს უდიდესი და ცნობილი კურორტები, მაგ. ხერსონისოსი, მალია, სტალისი. აქვე მდებარეობს უდიდესი სასტუმროები.

კუნძულის ლამაზი ქალაქები, ღირშესანიშნაობები, თვალწარმტაცი სანაპიროები მილიონობით დამსვენებელს იზიდავს.

ირაკლიონის არქეოლოგიური მუზეუმი

კუნძულის დედაქალაქის, ირაკლიონის, არქეოლოგიური მუზეუმი გვთავაზობს 3.400 წლის წინანდელ ხელოვნების და კულტურის საგანძურს. მსოფლიოს არცერთი სხვა მუზეუმი არ ფლობს ამ დროის ამდენ აღმოჩენას.

ორ სართულზე მნახველი აღფრთოვანებით და გაოცებით გაეცნობა ისტორიულ საგანძურს,  გემების მოდელებს, სახლების ფასადებს, სამკაულებს, ბეჭდებს, რომლებიც გვაცნობენ 3.500 წლის წინანდელ ყოველდღიურობას. განსაკუთრებულ ყურადღებას იპყრობს ულამაზესი თიხის ნაკეთობები.

ირაკლიონის არქეოლოგიურ მუზეუმში ინახება უნიკალური ფესტოს ქვა, რომელიც ბრინჯაოს ხანის უმნიშვნელოვანეს აღმოჩენადაა მიჩნეული.  ეს არის გამომწვარი თიხისგან დამზადებული ნაკეთობა. ფესტოს ქვაზე სპირალურად არის ამოტვიფრული ადამიანების, ცხოველების და მცენარეების მოტივები, რომლებიც სხვადასხვა შტამპით არის ამოკვეთილი. ამდენად ქვა წარმოგვიდგენს პირველ შტამპის შემთხვევას, რომელიც ტექსტში განმეორებად სიმბოლოებს წარმოგვიდგენს. ქვა ამ სახეობის ერთადერთი აღმოჩენილი ეგზემპლარია. ფესტოს ქვასთან დაკავშირებული ყველა საკითხი, რომელიც მისი შექმნის მიზანს, მის კულტურულ და გეოგრაფიულ წარმომავლობას, კითხვის მიმართულებას შეეხება, დღემდე დავის საგანია.

ფესტოს ქვა 1908 წლის 3 ივლისს მინოანის სასახლეში აღმოაჩინეს არქეოლოგებმა იტალიელი ლუიჯი პერნიერის ხელმძღვანელობით. მეცნიერთა ვარაუდით, მისი ასაკი 3.500 წელს უნდა აღემატებოდეს.

ფესტოს ქვა 16 სანტიმეტრიანი ფილაა სპირალური ფორმით ამოტვიფრული მოტივებით, საერთო ჯამში 241 ტვიფრით, რომლებიც გამყოფი ხაზებით 61 ჯგუფად ნაწილდება. მათ გაშიფვრას და აღწერას მრავალი მეცნიერი ცდილობს, მაგრამ არცერთ მცდელობას ჯერჯერობით სამეცნიერო აღიარება არ მოუპოვებია. 

კნოსოსის სასახლე

კრეტაზე მშვენიერი სანახაობაა კნოსოსის სასახლე, რომელიც ითვლება მინოანის ეპოქის ცენტრად. ასწლეულების მანძილზე კნოსოსის სასახლეს ბორცვი ფარავდა. ცნობილი გერმანელი არქეოლოგი ჰაინრიხ შლიმანი ამაოდ ცდილობდა 1886-89 წლებში ამ ადგილებში გათხრების უფლების მოპოვებას.

ინგლისელმა არტურ ევანსმა მოახერხა, რომ 1894 წლიდან ბორცვზე მუშაობა დაწყებულიყო. სამუშაოები 1900 წელს დაიწყო და 1925 წლამდე გაგრძელდა. მთავარი ნაწილი მალე იქნა აღმოჩენილი. სასახლეს ჩაუტარდა რეკონსტრუქცია ბეტონით, თაბაშირით და საღებავებით, რადგან ხის სვეტები დრომ ვერ შემოინახა, ასევე ბევრი გადახურვა ჩამოინგრა. შემდეგ რკინაბეტონის სვეტები ჩამოისხა, ყავისფრად შეიღება, რომ ხის ელფერი მისცემოდა. ბეტონის გამოყენების შედეგად შეიქმნა ახალი კედლები, ფრესკები, საფეხურები, რომლებიც სხვადასხვაფრად შეიღება. ევანსმა ამ უძველეს კულტურულ ძეგლს პირვანდელი ელფერი დაუბრუნა და ასე იქცა კნოსოსის სასახლე ერთ-ერთ ყველაზე საინტერესო სანახაობად კრეტაზე. 

კნოსოსის სასახლის  აღმოჩენიდან 100 წელი გავიდა და ამჯერადაც უამრავ სარესტავრაციო სამუშაოებს საჭიროებს. ძეგლს ყოველწლიურად 1,3 მილიონი ტურისტი სტუმრობს, რომლებიც არქეოლოგიურ ნანგრევებზე დადიან და გარკვეულ ზიანს აყენებენ. რესტავრაციის დროს კვლავ ხეს გამოიყენებენ, რაც მას მეტად მიანიჭებს პირვანდელ ელფერს, ასევე გადაიხურება სხვადასხვა დარბაზები. ბეტონის კონსტრუქციები სხვა მასალით უნდა ჩანაცვლდეს, რადგან ისინი ზეწოლას ახდენენ ანტიკურ ნანგრევებზე და აზიანებენ მათ. 
კნოსოსის სასახლე მოიცავს 22.000 კვ.კმ. ფართობს. სასახლეში არის ზედა განათების დარბაზები, საფეხურები, სახელოსნოები, საკუჭნაოები. 

არკადის მონასტერი.

მონასტერი კრეტის უმნიშვნელოვანესი ეროვნული ძეგლია. ის დიდ როლს თამაშობდა დამოუკიდებლობისთვის ბრძოლაში ოსმანთა სამეფოს წინააღმდეგ. ეკლესია გამოსახული იყო 100 დრაჰმიან კუპიურაზე.

გადმოცემის თანახმად, მონასტერი აიგო ბიზანტიის იმპერატორის არკადიუსის მიერ მე-5 საუკუნეში. მეცნიერები მას ამავე სახელის ბერს მიაწერენ. მონასტრის სახელწოდება დასტურდება მე-14 საუკუნის წარწერით. ორნავიანი, რენესანსის ელემენტების შემცველი ბაზილიკა 1587 წელს აიგო ძველი ეკლესიის ადგილას. მე-17 საუკუნემდე მონასტერში ყვაოდა კულტურული და სულიერი ცხოვრება.

ოსმალების მიერ კრეტის დაპყრობის შემდეგ მონასტერმა მრავალი უმძიმესი ტრაგედია გადაიტანა, რაც დასრულდა კრეტის დამოუკიდებლობის გამოცხადების და საბერძნეთთან შეერთების შედეგად. 

პრეველის მონასტერი

პრეველის მამათა მონასტერი მდებარეობს კრეტის სამხრეთით. მონასტერი წარმოადგენს კრეტის ნახევრადავტონომიურ ეკლესიას, რომელიც კონსტანტინეპოლის პატრიარქს ექვემდებარება და 1913 წლიდან საბერძნეთის ეკლესიასთან ასოცირდება. საბერძნეთის დროშასთან ერთად აქ ბიზანტიური ორთავიანი არწივიანი დროშაც ფრიალებს. 

აია ნიკოლაუსი

 აია ნიკოლაუსი იყო აგრარული ქალაქი კრეტას ჩრდილოეთ კუნძულზე. დღეს ის ერთ-ერთი ყველაზე ცნობილი კურორტია  კრეტაზე. 10.000 მცხოვრებით ის არის ოლქის დედაქალაქი. ქალაქს შენარჩულებული აქვს კრეტის შარმი.

  ქალაქის სახელი წარმოდგება აია ნიკოლაუსის ეკლესიისგან, რომელიც X საუკუნით თარიღდება და კრეტას უძველეს და კარგად შემონახულ ტაძრად ითვლება. ის ქალაქის ჩრდილო-აღმოსავლეთით ნახევარკუნძულზე მდებარეობს.  

ქალაქის ცენტრში არის ყურე, რომლის გარშემო წრეს კრავს მრავალი რესტორანი, ტავერნა და ბარი. საინტერესოა მისი მუზეუმები. აქ მდებარე არქეოლოგიური მუზეუმი მნიშვნელობით მეორეა ირაკლიონის მუზეუმის შემდეგ. ის ცნობილია პრემიონისტური ეპოქის ექსპონატებით. ხელოვნების მუზეუმი ფლობს ბოლო საუკუნეების  საინტერესო ექსპონატებს, უპირატესად ყოველდღიური მოხმარების საგნებს, მუსიკალური ინსტრუმენტებს და სხვა მრავალს. 

გეორგიოუპოლისი

გეორგიოუპოლისი მდებარეობს კრეტის ჩრდილო-დასავლეთით ხაინასა და რეთიმნონს შორის. მეთევზეების პატარა დასახლება წლების განმავლობაში გადაიქცა ტურისტულ ზონად. ადრე გეორგიოუპოლისს  ძირითადად ინდივიდუალური დამსხვენებლები სტუმრობდნენ, რაც ბოლო წლებში მნიშვნელოვნად შეიცვალა. სანაპიროზე და აღმოსავლეთ ნაწილში სასტუმროთა კომპლექსები აშენდა.

 

ცენტრი არის პლატია, სადაც ქუჩები ერთდება და კაფეები და რესტორნებია განლაგებული.

ადრე გეორგიოპოლუსი ჭაობიანი ადგილი იყო, შემდეგ ევკალიპტის ხეებმა ის ამოაშრო და გაამყარა, რადგან ეს ხეები დიდი რაოდენობით წყალს მოიხმარენ

გეორგიოუპულოსში სამი მდინარე მოედინება და ზღვას უერთდება. ნავსადგური არ არის ხმაურიანი და ის საყვარელი სასეირნო ადგილია. 

 ლოუტრო

ლოუტრო პატარა ნავსადგურია კრეტის სამხრეთ კუნძულზე. ის ძალიან მიმზიდველი და მყუდროა, რადგან აქ მოხვედრა მხოლოდ ნავით ან ფეხით შეიძლება. ასეთი განმარტოებულობა და ავტომანქანების არყოფნა ლოუტროს განტვირთვის და დასვენების ადგილად აქცევს.

რესტორნების, ბარების, სასტუმროების უმეტესობა მდებარეობს წყლის პირას. უდიდესი სიამოვნებაა აქ საღამოს გატარება.

სანაპირო მდებარებოს ყურეში. სანაპირო არის ქვიანი. ულამაზესი პლაჟებია ლოუტროს ახლოს, სადაც მისვლა შეიძლება მეთევზის ნავით ან ფეხით.

მატალა

მატალა მდებარეობს კუნძულ კრეტას სამხრეთ. ის ცნობილია თავისი გამოქვაბულებით, რომელიც კლდეში იქნა გამოკვეთილი საუკუნეების წინ. ამ ქვაბულებში ადრეულ ხანაში რომაელები ცხოვრობდნენ. ბევრად გვიან, უკვე 1960-იან წლებში მისი ბინადარნი ჰიპები იყვნენ. გამოქვაბულები მდებარეობს მატალას სანაპიროზე, ჩრდილოეთით. ისინი ყოველწლიურად მრავალრიცხოვან ტურისტებს მასპინძლობენ.

ყურის სამხრეთით არის მატალას ცენტრი, სადაც არის რესტორნები, ბარები, მაღაზიები. ბევრი მათგანი წლის ნაპირთან მდებარეობს და ზღვის და გამოქვაბულების მშვენიერ ხედს გვთავაზობს. 

პალეოხორა

პალეოხორა მდებარეობს კრეტის სამხრეთ-აღმოსავლეთით და უმთავრესად ინდივიდუალური დამსვენებლები სტუმრობენ. კურორტი მდებარეობს ნახევარკუნძულზე. ადგილი არის უმშვენიერესი. აქ არ არის სასტუმროთა კომპლექსები და ბევრი მაღაზიები.

დასავლეთით არის გრძელი ლამაზი ქვიშიანი პლაჟი, აღმოსავლეთით - ქვიანი სანაპირო. პალეოხორა არის საუკეთესო ადგილი ექსკურსიების მოსაწყობად. 

პლაკიასი

პლაკიასი მდებარეობს კრეტის სამხრეთ ქვიშიან სანაპიროზე ზღვის პირას და დიდი მთებით არის გარშემორტყმული. მთავარი ქუჩა ზღვას მიუყვება. აქ არის ბევრი რესტორანი, ბარი, საიდანაც შესანიშნავი ხედი იშლება. პლაკიასი ადრე ინდივიდუალური დასვენების ადგილი იყო, მაგრამ ეს დიდი ხანია შეიცვალა და ტურისტები ხშირად სტუმრობენ კურორტს. პლაკიასი ასევე იდეალური ადგილია სხვადასხვა ღონისძიებების დასაგეგმად. 

.