Sunday, July 31, 2011

სანტორინი - თვალისმომჭრელი კუნძულები

ნამგალის ფორმის სანტორინის კუნძული მდებარეობს კრეტას ჩრდილოეთით, 100 კილომეტრის დაშორებით და გეოგრაფიულად ბერძნული კიკლადების არქიპელაგის ჯგუფს მიეკუთვნება, რომელშიც ასევე მიკონოსი შედის. კუნძულებს დახლოებით 90 კვ.კმ. ფართობი უკავია და 14 000 ადამიანითაა დასახლებული.

სანტორინი, თავის მხრივ,  სამი კუნძულისგან შედგება. მთავარი კუნძული თირა ნამგალის ფორმით უფრო პატარა კუნძულების თირასიას და ასპრონისის პირდაპირ მდებარეობს. 

 ძველი წელთაღრიცხვით 1628-1627 წლებში უდიდესი ზღვისქვეშა ვულკანი ამოიფრქვა, რის შედეგადად წყლის უზარმაზარმა ნაკადმა კრეტაზე მინოიური კულტურის ძეგლები გაანადგურა. უძლიერესმა ვულკანმა კუნძული გახლიჩა და დღევანდელი ფორმა მისცა.

ყველაზე მაღალი მთა არის ელიას მთა 565 მ. სანტორინი ტურისტებისთვის გახსნილია, აქვს საკუთარი აეროპორტი, ასევე ულამაზესია მოგზაურობა გემით. კუნძულზე არის საუკეთესო სასტუმროები, ბანაკები, კერძო სასტუმროები. 

 

სანტორინისთვის დამახასიათებელია თეთრი და ყვავილებით შემკული სახლები. ბევრი მათგანი ლურჯი სახურავით არის დახურული - ეს პატარა ზომის მართლმადიდებლური ეკლესიაა. ყოველი ასეთი პატარა ეკლესია, რომელიმე ადგილობრივი ან ჩამოსული ოჯახის მიერ არის აშენებული რაიმე ღირსშესანიშნავი მოვლენის აღსანიშნავად და უფლისადმი მადლიერების გამოხატვის ნიშნად. სანტორინის აქვს რამდენიმე პლიაჟი. ყველაზე ცნობილია კამარი.

ძველი თერა

გერმანელმა ბარონმა ჰილერ ფონ გერტინგენმა 1866-1902 წლებში თავისი ხარჯებით მოაწყო გათხრები და მესავოუნოს მთაზე 6 მ. სისქის მიწის და ფერფლის ქვეშ აღმოაჩინა ანტიკური ქალაქის - თერას ნაშთები. 

თერა ძველი წელთაღრიცხვით 1000 წელს დააარსეს დორიელებმა, რომლებმაც საბერძნეთზე გაიარეს. ძველი წელთაღრიცხვით 630 წელს თერადან გადმოსახლებულებმა დააარსეს ჩრდილოაფრიკული კოლონია კირინიე. თერაში შემორჩენილი შენობების ნაშთები ელინურ ეპოქას მიეკუთვნება (322-169 ძვ.წ.), როდესაც ეგვიპტეში მცხოვრები მმართველები პროლემეირის დინასტიიდან ეგეოსის კუნძულებს აკონტროლებდნენ. სანტორინი მათთვის იყო საზღვაო ფლოტის ბაზა. კამარის სანაპიროს და მესავოუნოს ციცაბო კლდოვან ნაპირს შორის კუთხე მათთვის ხელსაყრელი ნავსადგური იყო, რადგან სამი მხრიდან ციცაბო კლდოვანი ნაპირი აქვს და ამიტომ ქალაქი ძნელად დასაპყრობად ითვლებოდა. რომაელთა ხანაში ქალაქმა დაკარგა თავისი მნიშვნელობა.

ძველი თერა მდებარეობს მთებში, კამარის და პერისას სანაპიროებს შორის. 

 დათვალიერება იწყება პატარა სამლოცველოთი Agios Stefanos, სადაც შეინიშნება ადრექრისტიანული ბაზილიკის ნარჩენები. კლდოვან პლატფორმასთან მივყავართ გზას, სადაც პტოლემეელი ადმირალის ბრძანებით ტაძარი იყო აგებული. კედლის რელიეფურ ნამუშევარზე არწივი ზევსის სიმბოლოა, ლომი აპოლონის, დელფინი ზღვის ღმერთის პოსეიდონის. ასევე შესაძლებელია ტაძრის დამაარსებლის სურათის ნახვა. შემდეგ გზა ანტიკურ აგორასთან მიდის, საბაზრო მოედანთან, სვეტებიანი დარბაზების და ნაყოფიერების სიმბოლოს დიონისეს ტაძრის ნაშთებით. მარცხნივ გვხვდება პტოლემეურ-რომაული ტაძარი და რომაული აბანოები. შემდეგ მივდივართ კლოდვან ადგილას, რომელიც აპოლონის კულტის ცენტრი იყო. ამ ტერასაზე ასევე მდებარეობდა ძველი წელთაღრიცხვის VI საუკუნის აპოლონის ტაძარი, რომლისგანაც ბევრი აღარაფერია შემორჩენილი.

 ფირას მართლმადიდებლური საკათედრო ტაძარი 

 

თანამედროვე ბერძნული მართლმადიდებლური ტაძარი კუნძულების დედაქალაქ ფირაზე მაღალი გუმბათით ულამაზესი სასტუმრო ატლანტისის გვერდით მდებარეობს. ეკლესია ღმრთისმშობლის სახელზეა ნაკურთხი. 1956 წლის მიწისძვრის შემდეგ ის თითქმის ახლიდან აშენდა და ულამაზესი კედლის მხატვრობით შეიმკო. 

 კაპ აკროტირი და მისი შუქურას კოშკი

სანტორინის სამხრეთ-დასავლეთით არის განსაკუთრებული ადგილი, სადაც უმშვენიერესი შუქურიანი კოშკია აგებული. 110 მ. სიმაღლიდან ის გზას უჩვენებს კრეტადან და როდოსიდან მომავალ გემებს. 

 შუქურას გარშემო შესაძლებელია კლდოვან ბორცვებზე აცოცება და განმარტოებული და წყნარი ადგილის მონახვა, რათა აქედან კრეტის ზღვის და გარემოს სილამაზით დატკბეთ. მზის ჩასვლის პერიოდი განსაკუთრებით ლამაზია ამ ადგილას.

სანტორინის სანაპიროები

წითელი სანაპირო

ეს სანაპირო 200 მ. სიგრძისაა და გადაჭიმულია წითელლავა ციცაბო სანაპიროზე. აკტორინის სადგურიდან აქ 15 წუთში შეიძლება ფეხით მისვლა, შესაძლებელია ნავის დაქირავებაც. სანაპირო ულამაზესია. აქვე შეიძლება ქოლგის და შეზლონგის დაქირავება და ცივი სასმელების გასინჯვა. 

 თეთრი სანაპირო

თეთრი სანაპირო მხოლოდ 70 მ. სირძისაა. სანაპირომდე მისვლა ნავით არის შესაძლებელი. სანაპიროზე მისასვლელი უხეში ქვიშითაა დაფარული და ამიტომ ფეხით მისვლა არ არის სასურველი. 

 

თეთრი სანაპირო ქვიანია. აქაც შესაძლებელია დასვენება და ცივი სასმელების დაგემოვნება. თეთრი სანაპიროდან ცურვა პატარა თეთრ კლდეებს შორის არის ულამაზესი. ცხელ სეზონზე აქ უამრავი ხალხია. 

 პერივოლის სანაპირო

პერივოლის სანაპირო არის ფაფუკი ქვიშიანი და სანტორინიზე ყველაზე გრძელი. ის 20-30მ. სიგანისაა და ადვილად მისასვლელი ფეხითაც და საზოგადოებრივი ტრანსპორტითაც. 

 

სანაპიროს ვიწრო ქუჩას გარს აკრავს ტავერნები, თვალშისაცემად ლამაზად მოწყობილი ბარები, სადაც მუდამ ხალხმრავლობაა და სასმელების ყველა სახეობას გვთავაზობენ, განსაკუთრებით კოქტეილს და შამპანურს. სანაპიროზე შესაძლებელია წყლის სპორტის სახეობებში თავის გამოჩენაც. 

 

ვლიხადას სანაპირო

ვლიხადას სანაპირო იწყება  ამავე სახელობის იახტების და სამაშველო სამსახურის ახალი ნავსადგურიდან და სამხრეთისკენ არის გადაჭიმული თითქმის 1 კილომეტრზე.

სამხრეთ ნაწილში მდებარეობს ულამაზესი სანაპიროს ბარი "Thros Beach". აქვეა ფრენბურთის მოედანი. 

მონოლითოს სანაპირო

მონოლითოს სანაპირო შორიდან თვალშისაცემია იმ ლამაზი კლდის გამო, საიდანაც მეზობელი კუნძული ანაფი ჩანს და რომლის სახელიც სანაპიროს ეწოდა. ის არის 33 მ. სიმაღლის და 200 მლნ. წელზე მეტი ხნის.სანაპიროზე არის უძველესი ტავერნა სკარამანგასი, სადაც თევზის დაგემოვნებაცაა შესაძლებელი. 

 

Saturday, July 9, 2011

კრეტა - მზის და ზღვის სამეფო

კრეტა ცნობილი საკურორტო კუნძულია. ყოველწლიურად მილიონობით ტურისტი სტუმრობს კუნძულს.კრეტა ყველაზე დიდი კუნძულია საბერძნეთში (8000 კვ.კმ.), 600 000 მცხოვრებით. ის არის ევროპის ერთ-ერთი უკიდურესი სამხრეთი კუნძული და ამინდი აქ უნიკალურია - 300 მზიანი დღით. 

 ტურისტების სიმრავლე უფრო მეტად შეინიშნება კრეტის ჩრდილოეთით. ქალაქების და ნავსადგურების ჰერაკლიონის და ხანიას ახლოს მდებარეობს უდიდესი და ცნობილი კურორტები, მაგ. ხერსონისოსი, მალია, სტალისი. აქვე მდებარეობს უდიდესი სასტუმროები.


კუნძულის ლამაზი ქალაქები, ღირშესანიშნაობები, თვალწარმტაცი სანაპიროები მილიონობით დამსვენებელს იზიდავს.


ირაკლიონის არქეოლოგიური მუზეუმი
კუნძულის დედაქალაქის, ირაკლიონის, არქეოლოგიური მუზეუმი გვთავაზობს 3.400 წლის წინანდელ ხელოვნების და კულტურის საგანძურს. მსოფლიოს არცერთი სხვა მუზეუმი არ ფლობს ამ დროის ამდენ აღმოჩენას.
ორ სართულზე მნახველი აღფრთოვანებით და გაოცებით გაეცნობა ისტორიულ საგანძურს,  გემების მოდელებს, სახლების ფასადებს, სამკაულებს, ბეჭდებს, რომლებიც გვაცნობენ 3.500 წლის წინანდელ ყოველდღიურობას. განსაკუთრებულ ყურადღებას იპყრობს ულამაზესი თიხის ნაკეთობები.




ირაკლიონის არქეოლოგიურ მუზეუმში ინახება უნიკალური ფესტოს ქვა, რომელიც ბრინჯაოს ხანის უმნიშვნელოვანეს აღმოჩენადაა მიჩნეული.  ეს არის გამომწვარი თიხისგან დამზადებული ნაკეთობა. ფესტოს ქვაზე სპირალურად არის ამოტვიფრული ადამიანების, ცხოველების და მცენარეების მოტივები, რომლებიც სხვადასხვა შტამპით არის ამოკვეთილი. ამდენად ქვა წარმოგვიდგენს პირველ შტამპის შემთხვევას, რომელიც ტექსტში განმეორებად სიმბოლოებს წარმოგვიდგენს. ქვა ამ სახეობის ერთადერთი აღმოჩენილი ეგზემპლარია. ფესტოს ქვასთან დაკავშირებული ყველა საკითხი, რომელიც მისი შექმნის მიზანს, მის კულტურულ და გეოგრაფიულ წარმომავლობას, კითხვის მიმართულებას შეეხება, დღემდე დავის საგანია.

ფესტოს ქვა 1908 წლის 3 ივლისს მინოანის სასახლეში აღმოაჩინეს არქეოლოგებმა იტალიელი ლუიჯი პერნიერის ხელმძღვანელობით. მეცნიერთა ვარაუდით, მისი ასაკი 3.500 წელს უნდა აღემატებოდეს.

ფესტოს ქვა 16 სანტიმეტრიანი ფილაა სპირალური ფორმით ამოტვიფრული მოტივებით, საერთო ჯამში 241 ტვიფრით, რომლებიც გამყოფი ხაზებით 61 ჯგუფად ნაწილდება. მათ გაშიფვრას და აღწერას მრავალი მეცნიერი ცდილობს, მაგრამ არცერთ მცდელობას ჯერჯერობით სამეცნიერო აღიარება არ მოუპოვებია. 

კნოსოსის სასახლე

კრეტაზე მშვენიერი სანახაობაა კნოსოსის სასახლე, რომელიც ითვლება მინოანის ეპოქის ცენტრად. ასწლეულების მანძილზე კნოსოსის სასახლეს ბორცვი ფარავდა. ცნობილი გერმანელი არქეოლოგი ჰაინრიხ შლიმანი ამაოდ ცდილობდა 1886-89 წლებში ამ ადგილებში გათხრების უფლების მოპოვებას.

ინგლისელმა არტურ ევანსმა მოახერხა, რომ 1894 წლიდან ბორცვზე მუშაობა დაწყებულიყო. სამუშაოები 1900 წელს დაიწყო და 1925 წლამდე გაგრძელდა. მთავარი ნაწილი მალე იქნა აღმოჩენილი. სასახლეს ჩაუტარდა რეკონსტრუქცია ბეტონით, თაბაშირით და საღებავებით, რადგან ხის სვეტები დრომ ვერ შემოინახა, ასევე ბევრი გადახურვა ჩამოინგრა. შემდეგ რკინაბეტონის სვეტები ჩამოისხა, ყავისფრად შეიღება, რომ ხის ელფერი მისცემოდა. ბეტონის გამოყენების შედეგად შეიქმნა ახალი კედლები, ფრესკები, საფეხურები, რომლებიც სხვადასხვაფრად შეიღება. ევანსმა ამ უძველეს კულტურულ ძეგლს პირვანდელი ელფერი დაუბრუნა და ასე იქცა კნოსოსის სასახლე ერთ-ერთ ყველაზე საინტერესო სანახაობად კრეტაზე. 

კნოსოსის სასახლის  აღმოჩენიდან 100 წელი გავიდა და ამჯერადაც უამრავ სარესტავრაციო სამუშაოებს საჭიროებს. ძეგლს ყოველწლიურად 1,3 მილიონი ტურისტი სტუმრობს, რომლებიც არქეოლოგიურ ნანგრევებზე დადიან და გარკვეულ ზიანს აყენებენ. რესტავრაციის დროს კვლავ ხეს გამოიყენებენ, რაც მას მეტად მიანიჭებს პირვანდელ ელფერს, ასევე გადაიხურება სხვადასხვა დარბაზები. ბეტონის კონსტრუქციები სხვა მასალით უნდა ჩანაცვლდეს, რადგან ისინი ზეწოლას ახდენენ ანტიკურ ნანგრევებზე და აზიანებენ მათ. 
კნოსოსის სასახლე მოიცავს 22.000 კვ.კმ. ფართობს. სასახლეში არის ზედა განათების დარბაზები, საფეხურები, სახელოსნოები, საკუჭნაოები. 


არკადის მონასტერი.
მონასტერი კრეტის უმნიშვნელოვანესი ეროვნული ძეგლია. ის დიდ როლს თამაშობდა დამოუკიდებლობისთვის ბრძოლაში ოსმანთა სამეფოს წინააღმდეგ. ეკლესია გამოსახული იყო 100 დრაჰმიან კუპიურაზე.
გადმოცემის თანახმად, მონასტერი აიგო ბიზანტიის იმპერატორის არკადიუსის მიერ მე-5 საუკუნეში. მეცნიერები მას ამავე სახელის ბერს მიაწერენ. მონასტრის სახელწოდება დასტურდება მე-14 საუკუნის წარწერით. ორნავიანი, რენესანსის ელემენტების შემცველი ბაზილიკა 1587 წელს აიგო ძველი ეკლესიის ადგილას. მე-17 საუკუნემდე მონასტერში ყვაოდა კულტურული და სულიერი ცხოვრება.
ოსმალების მიერ კრეტის დაპყრობის შემდეგ მონასტერმა მრავალი უმძიმესი ტრაგედია გადაიტანა, რაც დასრულდა კრეტის დამოუკიდებლობის გამოცხადების და საბერძნეთთან შეერთების შედეგად. 



პრეველის მონასტერი
პრეველის მამათა მონასტერი მდებარეობს კრეტის სამხრეთით. მონასტერი წარმოადგენს კრეტის ნახევრადავტონომიურ ეკლესიას, რომელიც კონსტანტინეპოლის პატრიარქს ექვემდებარება და 1913 წლიდან საბერძნეთის ეკლესიასთან ასოცირდება. საბერძნეთის დროშასთან ერთად აქ ბიზანტიური ორთავიანი არწივიანი დროშაც ფრიალებს. 




აია ნიკოლაუსი

 აია ნიკოლაუსი იყო აგრარული ქალაქი კრეტას ჩრდილოეთ კუნძულზე. დღეს ის ერთ-ერთი ყველაზე ცნობილი კურორტია  კრეტაზე. 10.000 მცხოვრებით ის არის ოლქის დედაქალაქი. ქალაქს შენარჩულებული აქვს კრეტის შარმი.
  ქალაქის სახელი წარმოდგება აია ნიკოლაუსის ეკლესიისგან, რომელიც X საუკუნით თარიღდება და კრეტას უძველეს და კარგად შემონახულ ტაძრად ითვლება. ის ქალაქის ჩრდილო-აღმოსავლეთით ნახევარკუნძულზე მდებარეობს.  
ქალაქის ცენტრში არის ყურე, რომლის გარშემო წრეს კრავს მრავალი რესტორანი, ტავერნა და ბარი. საინტერესოა მისი მუზეუმები. აქ მდებარე არქეოლოგიური მუზეუმი მნიშვნელობით მეორეა ირაკლიონის მუზეუმის შემდეგ. ის ცნობილია პრემიონისტური ეპოქის ექსპონატებით. ხელოვნების მუზეუმი ფლობს ბოლო საუკუნეების  საინტერესო ექსპონატებს, უპირატესად ყოველდღიური მოხმარების საგნებს, მუსიკალური ინსტრუმენტებს და სხვა მრავალს. 

გეორგიოუპოლისი
გეორგიოუპოლისი მდებარეობს კრეტის ჩრდილო-დასავლეთით ხაინასა და რეთიმნონს შორის. მეთევზეების პატარა დასახლება წლების განმავლობაში გადაიქცა ტურისტულ ზონად. ადრე გეორგიოუპოლისს  ძირითადად ინდივიდუალური დამსხვენებლები სტუმრობდნენ, რაც ბოლო წლებში მნიშვნელოვნად შეიცვალა. სანაპიროზე და აღმოსავლეთ ნაწილში სასტუმროთა კომპლექსები აშენდა.

 
ცენტრი არის პლატია, სადაც ქუჩები ერთდება და კაფეები და რესტორნებია განლაგებული.
ადრე გეორგიოპოლუსი ჭაობიანი ადგილი იყო, შემდეგ ევკალიპტის ხეებმა ის ამოაშრო და გაამყარა, რადგან ეს ხეები დიდი რაოდენობით წყალს მოიხმარენ
გეორგიოუპულოსში სამი მდინარე მოედინება და ზღვას უერთდება. ნავსადგური არ არის ხმაურიანი და ის საყვარელი სასეირნო ადგილია. 


 ლოუტრო
ლოუტრო პატარა ნავსადგურია კრეტის სამხრეთ კუნძულზე. ის ძალიან მიმზიდველი და მყუდროა, რადგან აქ მოხვედრა მხოლოდ ნავით ან ფეხით შეიძლება. ასეთი განმარტოებულობა და ავტომანქანების არყოფნა ლოუტროს განტვირთვის და დასვენების ადგილად აქცევს.
რესტორნების, ბარების, სასტუმროების უმეტესობა მდებარეობს წყლის პირას. უდიდესი სიამოვნებაა აქ საღამოს გატარება.
სანაპირო მდებარებოს ყურეში. სანაპირო არის ქვიანი. ულამაზესი პლაჟებია ლოუტროს ახლოს, სადაც მისვლა შეიძლება მეთევზის ნავით ან ფეხით.



მატალა
მატალა მდებარეობს კუნძულ კრეტას სამხრეთ. ის ცნობილია თავისი გამოქვაბულებით, რომელიც კლდეში იქნა გამოკვეთილი საუკუნეების წინ. ამ ქვაბულებში ადრეულ ხანაში რომაელები ცხოვრობდნენ. ბევრად გვიან, უკვე 1960-იან წლებში მისი ბინადარნი ჰიპები იყვნენ. გამოქვაბულები მდებარეობს მატალას სანაპიროზე, ჩრდილოეთით. ისინი ყოველწლიურად მრავალრიცხოვან ტურისტებს მასპინძლობენ.
ყურის სამხრეთით არის მატალას ცენტრი, სადაც არის რესტორნები, ბარები, მაღაზიები. ბევრი მათგანი წლის ნაპირთან მდებარეობს და ზღვის და გამოქვაბულების მშვენიერ ხედს გვთავაზობს. 



პალეოხორა
პალეოხორა მდებარეობს კრეტის სამხრეთ-აღმოსავლეთით და უმთავრესად ინდივიდუალური დამსვენებლები სტუმრობენ. კურორტი მდებარეობს ნახევარკუნძულზე. ადგილი არის უმშვენიერესი. აქ არ არის სასტუმროთა კომპლექსები და ბევრი მაღაზიები.
დასავლეთით არის გრძელი ლამაზი ქვიშიანი პლაჟი, აღმოსავლეთით - ქვიანი სანაპირო. პალეოხორა არის საუკეთესო ადგილი ექსკურსიების მოსაწყობად. 



პლაკიასი
პლაკიასი მდებარეობს კრეტის სამხრეთ ქვიშიან სანაპიროზე ზღვის პირას და დიდი მთებით არის გარშემორტყმული. მთავარი ქუჩა ზღვას მიუყვება. აქ არის ბევრი რესტორანი, ბარი, საიდანაც შესანიშნავი ხედი იშლება. პლაკიასი ადრე ინდივიდუალური დასვენების ადგილი იყო, მაგრამ ეს დიდი ხანია შეიცვალა და ტურისტები ხშირად სტუმრობენ კურორტს. პლაკიასი ასევე იდეალური ადგილია სხვადასხვა ღონისძიებების დასაგეგმად. 


.

ბარსელონა - არქიტექტურული საოცრება

ბარსელონა ცნობილია როგორც ესპანეთის მეორე დედაქალაქი. ის ჩრდილოეთ ესპანეთის რეგიონის, კატალონიის დედაქალაქია, რომელისაც აქვს თავის ტრადიციები, სამზარეულო და ენაც. კატალონიელები ამაყობენ თავისი მდიდარი მემკვიდრეობით და წარმატებით უთავსებენ მას თანამედროვეობას. ახალი ნაგებობები საოცარი ჰარმონიითაა შერწყმული ისტორიულ ძეგლებთან. კულტურათა ეს შეთავსება ბარსელონას აქცევს მიმზიდველ და წარმტაც სამოგზაურო ადგილად. 


აღმოაჩინეთ კატალონიის მეტროპოლი ხმელთაშუა ზღვისპირას. იარეთ ანტონიო გაუდის ნაკვალევზე, აღფრთოვანდით მრავალრიცხოვანი გამოფენებით და იხეტიალეთ ლას რამბლასზე. დატკბით მრავალფეროვანი ხედებით ნავსადგურიდან, გიუელის პარკიდან, მონტიუკის მთიდან.
 
        გიუელის პარკი
        არქიტექტორ ანტონი გაუდის 1900 წელს დაევალა ქალაქის ბაღის პროექტის შემუშავება და აგება. ეს ბაღი გაუდის ყველაზე მრავალფეროვანი და გენიალური ქმნილება გახდა. აქ მდებარეობს ქვის შთამბეჭდავი კონსტრუქციები, ულამაზესი მოზაიკით, საოცარი ნაგებობებით.
დიდი ტერასიდან იშლება ხედი ბარსელონას შენობებზე. აქვეა პატარა ხელოვნების ნიმუშები. აქ იკრიბებიან მნახველები, მუსიკოსები, მხატვრები.
გიუელის პარკის მშენებლობისას გაუდიმ საოცრად შეუხამა პარკს არსებული ლანდშაფტი. 


          წმიდა ოჯახის (Sagrada Familia) ტაძარი 
        გაუდის დაუმთავრებელი შედევრი არის ბარსელონას უჩვეული და ცნობილი ღირშესანიშნაობა. თავის ბოლო ქმნილებაში გაუდიმ ჩადო მთელი შემოქმედებითი ენერგია და გაქანება. ტაძრის ისტორია იწყება I საუკუიდან. XI საუკუნეში ის რომანულ ტაძრად გადაკეთდა და მცირე ხანში დაიწყო მისი გარდასახვა რომანულ ეკლესიად.
 თითისტარის ფორმის კოშკები 115 მეტრამდე სიმაღლისაა. ჯერ დაუმთავრებელი მთავარი გუმბათის ზემოთა კოშკის სიმაღლე 170 მეტრი უნდა იყოს. ის ჯერაც შენდება. რადგან ყოველი ქვა ხელით უნდა იყოს დამუშავებული. ინდუსტიულად დამზადებული ქვების გამოყენება აქ არ შეიძლება. 

 1926 წელს ანტონიო გაუდი საგზაო შემთხვევას ემსხვერპლა. ის დილით ეკლესიაში მიდიოდა წირვაზე დასასწრებად, ტრამვაი რომ შეეჯახა. მისი სიკვდილის შემდეგ მშენებლობა შეჩერდა. დღეს ის გრძელდება შემოწირულობებით დაფინანსებული სამშენებლო სამუშაოებით. 


 Casa Milà
კაზა მილას მშენებლობა 1910 წელს დასრულდა.  მას ასევე La Pedrera ნუ ქვის სამტეხლო ეწოდება. გენიალურად შემუშავებული კონსტრუქციის წყალობით შესაძლებელია ბუნებრივი ჰაერაცია და კონდიციონერის საჭიროება აქ არ არსებობს. ბინებში ოთახების პლანირების ცვლილება შეიძლება "მოძრავი" კედლების მეშვეობით. განსაკუთრებით აღსანიშნავია კაზა მილას აივნის გისოსები. ყოველი მათგანი განსხვავებულია. კაზა მილაში შესაძლებელია ზოგიერთი ბინის დათვალიერებაც.
1984 წელს la Pedrera იუნესკოს მსოფლიო კულტურული მემკვიდრეობის სიაში შევიდა. 


 კაზა ბატლო 
ეს შედევრი ბუნებასთან შერწყმულობის კიდევ ერთი საოცარი დადასტურებაა. აივნები ადამიანის სახეს გვაგონებს, ლამაზ სვეტებზე, როგორც ფეხებზე დგას ეს ცოცხალი ქმნილება. შენობის გარე ფასადი თავისი ფერებით რიფებს და ზღვის ტალღებს გვაგონებს. სახურავი თითქოს დრაკონის ზურგია. კაზა ბატლოში წმიდა გიორგის მიერ ურჩხულის მოკვლის მოტივებია ჩაქსოვილი. 
შენობა ანტონიო გაუდის მიერ აიგო 1904-1906 წლებში. 1995 წელს მას საფუძვლიანი რეკონსტრუქცია ჩაუტარდა. 


     მონტიუკის ციხესიმაგრე 

    საბაგირო გზით შეიძლება მთის ფერდობზე მდებარე ციხესიმაგრესთან მოხვედრა. მონტიუკის ციხე ბარსელონას გადაჰყურებს. აქედან უმშვენიერესი ხედი იშლება ქალაქზე და ნავსადგურზე.  

ციხესიმაგრე აიგო ქალაქის და ნავსადგურის დასაცავად. პირველი კედლები 1640 წელს აღიმართა. ფილიპ IV-ის წინააღმდეგ აჯანყების დროს ძველი ციხე დაინგრა და შემდეგ წლებში მონტიუკის ციხესიმაგრე დღევანდელი ფორმით აშენდა. გარდა ამისა, ის 120 ზარბაზნით აღიჭურვა. 

    დღეს ნაგებობა წარმოადგენს ისტორიულ ძეგლს ცენტრალისტური რეპრესიებისა და კატალონური მმართველობისა. ფრანკოს რეჟიმის დროს აქ ამ რეჟიმის მრავალი მოწინააღმდეგე დაიჭირეს და დასაჯეს. სამხედრო საპატიმროს პერიოდის შემდეგ ის სამხედრო მუზეუმს წარმოადგენს. 

 ტრიუმფალური თაღი ბარსელონაში

ტრიუმფალური თაღი 1888 წელს აიგო ბარსელონაში. 30 მეტრიანი თაღი აიგო მსოფლიო გამოფენისთვის. ის მთავარი შესასვლელი იყო დიდ გამოფენასთან. თაღის წინ არის ქვის ქანდაკება, რომელიც სიმბლოა ბარსელონას მასპინძლობისა. თაღის ზედა ნაწილში გამოსახულია ბარსელონას და ესპანეთის პროვინციების გერბები. არქიტექტორია ჯოზეფ ვილასეკა იკაზანოვასი, რომელმაც წითელი თაღი ახლებურ სტილში ააგო. 

    საკათედრო ტაძარი

   ქალაქის ცენტრში აღმართულია ბარსელონას ცნობილი გოთიკური საკათედრო ტაძარი. შთამბეჭდავი ნაგებობა ასევე ლა სეუდ იწოდება და ბარსელონას მფარველად ითვლება. ტაძარი წმიდა ევლალიას სახელზეა აგებული. 

 იმ ადგილას, სადაც საკათედრო ეკლესიაა, ადრე რომაული ტაძარი იყო. XIII-XV საუკუნეებში აქ ძველი ეკლესიის ადგილას საკათედრო ტაძარი აიგო. გოთიკური ფასადი XIX საუკუნეში შეიქმნა. 

    წმიდა ევლალია რომაელების მმართველობის დროს ეწამა. გადმოცემის თანახმად, ის შიშველი დააყენეს მოედანზე ადრეული გაზაფხულის ცივ დღეს. საოცარმა ნამქერმა  დაფარა მისი სიშიშვლე. გაავებულმა რომაელებმა ის კასრში ჩასვეს, სადაც დანები იყო გაყრილი და ეს კასრი ქუჩებში აგორეს. ნაწამები წმიდა ქალწულის ცხდარი საკათედრო ტაძრის საკურთხეველში განისვენებს.

   სანტა მარია დელ მარი

ლა რიბერას რაიონში მდებარეობს გოთიკური ტაძარი სანტა მარია დელ მარი. ვიწრო ქუჩებს შორის ტაძარი მთლიანად არ ჩანს. ტაძრის განსაკუთრებულობას წარმოადგენს სამშენებლო სტილის ერთიანობა. ტაძარი 1383 წელს დასრულდა. მშენებლებს 1379 წელს დიდი დაბრკოლების გადალახვა მოუხდათ. ცეცხლმა შენობის მნიშვნელოვანი ნაწილები დააზიანა. მიუხედავად ამისა, 1383 წლის 15 აგვისტოს აქ პირველი მესა ჩატარდა. 1428 წლის მიწისძვრამ ასევე დიდი ზიანი მიაყენა ტაძარს, რის გამოსწორებასაც რამდენიმე წელი დასჭირდა. 

    სრულიად განსხვავებულია ტაძრის შიდა სივრცე, ვიდრე ამას გარედან ივარაუდებთ. ფერადი სარკმლებიდან შუქი იღვრება. ბარსელონას სხვა ტაძრებისგან განსხვავებით აქ ხატებს ვერ ნახავთ. ისინი დაიწვა 1936 წლის არეულობების დროს.

    სანტა მარია დელ მარის ეკლესია უკვდავყოფილია ფალკონეს რომანში ”ზღვის საკათედრო ტაძარი”. 

   კოლუმბის სვეტი

    რამბლას ბოლოს ზღვის მიმართულებით აღმართულია ბარსელონას სიმბოლო - სვეტზე აგებული კოლუმბის ქანდაკება. სვეტი 60 მეტრის სიმაღლისაა. ქრისტეფორე კოლუმბის ქანდაკება ამ სიმაღლიდან იყურება ამერიკის მხარეს. ქანდაკება აიგო 1888 წელს მსოფლიო გამოფენისთვის. ის ეძღვნება ქრისტეფორე კოლუმბის დაბრუნებას ამერიკიდან, როდესაც მას მეფე ფერდინანდი და დედოფალი იზაბელი შეეგებნენ.კვარცხლბეკი ბრინჯაოთია მოპირკეთებული. შიგნით გაეცნობით ისტორიას ამერიკის აღმოჩენის შესახებ.
მნახველებს შეუძლიათ ლიფტით ავიდნენ სვეტის გადმოსახედზე და დატკბნენ ქალაქის და ნავსადგურის ხედით. 


   ბარსელონას აკვარიუმი

პორტთან ახლოს რამბლა დე მართან არის ბარსელონას მშვენიერი სანახაობა აკვარიუმი. ამ გრძელ გამჭირვალე შენობაში თევზები და ზღვის სხვა ბინადარნი ცხოვრობენ მსოფლიოს ყველა კუთხიდან. მრავალფეროვნებით გამოირჩევა ტროპიკული და ხმელთაშუა ზღვის ცხოველები.

    განსაკუთრებით პოპულარულია ზვიგენის ნიჟარა, რომელშიც მინის გვირაბს მივყავართ. დიდი ზვიგენები მნახველებთან უჩვეულოდ ახლოს მოდიან. აკვარიუმში დიდ და პატარა მნახველებს თვალწინ ეშლებათ მიმზიდველი და ხშირად მისტერიული წყალქვეშა სამყარო, რომელსაც სხვაგან ვერსად ნახავთ. 

   ლაბირინთის პარკი

   ლაბირინთის პარკი ცენტრიდან ცოტა მოშორებით მდებარეობს. ამ მიდამოებში არის მრავალრიცხოვანი წყაროები, რის გამოც აქ ხილი, ბოსტნეული და ვაზი იყო მოშენებული. XVIII საუკუნეში ამ ადგილას თავადებისთვის საზაფხულო რეზიდენცია გაშენდა.

 პარკი მთის ფერდობზეა გაშენებული და 40 მეტრიდან გადმოყურებს ქალაქს. არეალის მთავარი სანახაობა არის ლაბირინთი, რომელიც 1792 წელს გაშენდა. დამაბნეველი ბაღის კედლები კიპარისებისგან აიგო. შუაგულში არის მიზანი: მრგვალი მოედანი ეროსის ქანდაკებით. 

    ლაბირინთის გარდა პარკში არის მრავალრიცხოვანი უმშვენიერესი ადგილები დასასვენებლად.

   ტიბიდაბო

   ტიბიდაბო არის მთა ბარსელონას თავზე. აქ არამარტო განუმეორებელი ხედია ქალაქზე, არამედ სხვა მრავალი სანახაობაც. 512 მეტრი სიმაღლის მთაზე მდებარეობს ეკლესია, პარკი, სატელევიზიო ანძა.ტიბიდაბოს მთა არის ბარსელონას გარშემო ყველაზე მაღალი მთა. აქ მოხვედრა შეიძლება საბაგირო გზით. 

 მთის მწვერვალზე აგებული ეკლესია 1902-1961 წლებში აშენდა. Sagrat Cor წმიდა გულს ნიშნავს და იგულისხმება იესოს გული. ეკლესიის თავზე აღმართულია იესოს ბრინჯაოს ქანდაკება. კოშკებზე ასვლა შესაძლებელია. 

 ტიბიდაბოს პარკი არის საკმაოდ დიდი, 7 ჰექტარი ფართობის. ამ საოჯახო პარკში ყველა იპოვის თავის შესაფერის გასართობს.

 სატელევიზიო ანძაზე არის შესანიშნავი გადმოსახედი. დამთვალიერებლებს მშვენიერი პანორამა გადაეშლებათ ბარსელონას ყველაზე მაღალი წერტილიდან. 

ციტადელის პარკი.

Der Parc de la Ciutadella არის როგორც მწვანე ოაზისი ბარსელონას ცენტრში. პარკის ცენტრში კატალონიის პარლამენტი მდებარეობს. პარკში არის ზოოპარკი, ჩანჩქერი და მუზეუმები. 

 პარკის აგებამდე აქ ფილიპ V-ს ციტადელი იდგა. რომელმაც 1714 წელს ქალაქი დაიპყრო. ცენტრალური დიდი ციტადელიდან ბარსელონას მოქალაქეებზე ბატონობა უფრო ხელსაყრელი იყო. მისი მმართველობის დასრულების შემდეგ ეს უსიამოვნო მოგონებებთან დაკავშირებული შენობა დაანგრიეს.
დანგრეული ციტადელის ადგილას აღიმართა პარკი, რომელშიც 1888 წელს მსოფლიო გამოფენა გაიმართა. 


ბარსელონას ბაზრობა

   ბარსელონას ცენტრში მდებარეობს ბოქუერია. ის არის ქალაქის ულამაზესი სავაჭრო დარბაზი. ულამაზესი დეკორაციები მოწყობილია მინის მოზაიკით. რამბლაზე სეირნობისას ადვილად შეამჩნევთ ბაზრობის შესასვლელს. აქ ძალზე შთამბეჭდავია  ხილის და ბოსტნეულის დახლები, რომლებიც ხელოვნების ნიმუშებს გვაგონებენ. თევზის დახლებთან ნახავთ ყველაფერს, რაც კი ზღვაში შეიძლება დაიჭიროთ. მრავალფეროვნება არის უსაზღვრო. დარბაზებში ხეტიალი დიდ სიამოვნებას ანიჭებს სტუმარს. 

 ჯერ კიდევ მე-13 საუკუნეში აქ ქუჩის ბაზრობა იყო. 1826 წელს ეს კანონით აიკრძალა და მოგვიანებით სპეციალური შენობა აიგო. 1914 წელს საზეიმოდ გაიხსნა განახლებული შენობა მეტალის გადახურვით.